Félög


    Alþjóðanefnd

  • Alþjóðanefnd læknanema sér um skipulagningu skiptináms í gegnum SCOPE innan alþjóðlegu læknanemasamtakanna IFMSA (International Federation of Medical Students Associations). Í því felst að taka á móti erlendum læknanemum og að senda læknanema við HÍ í skiptinám til áfangastaða að þeirra ósk. Skiptinám klínískra læknanema er metið til eininga á valtímabili 6. árs. Hægt er að taka þátt í móttöku erlendra læknanema með því að skrá sig sem tengilið.
  • Ástblær

  • Ástblær er hinsegin félag læknanema. Sýn félagsins er að öll þau sem stunda nám í læknisfræði við Háskóla Íslands finni fyrir öryggi og líði vel innan deildarinnar, burtséð frá kynhneigð, kynvitund eða kyntjáningu. Auk þess er markmið Ástblæs stuðla að þekkingu læknanema á málefnum hinsegin fólks.
  • Ástráður

  • Ástráður er kynfræðslufélag sem er rekið af íslenskum læknanemum við Háskóla Íslands. Markmið Ástráðs er að fræða ungmenni landsins um kynlíf, kynheilbrigði og samskipti. Ár hvert heimsækir nefndin alla framhaldsskóla landsins og heldur fyrirlestur fyrir 1. árs nemendur.
  • Bjargráður

  • Bjargráður er félag skyndihjálparkennslu FL. Meginhlutverk þeirra er að standa að skyndihjálparkennslu fyrir framhaldsskólanema sem og aðra sem hafa áhuga. Þau skipuleggja einnig Bjargráðsviku fyrir fyrsta árs læknanema, koma að skipulagningu stórslysaæfingar með Kennslufélaginu, halda Bjargráðsvísó og lokahóf fyrir fyrsta árs nemana.
  • Félag Læknanema

  • Félag Læknanema (FL) var stofnað 6. mars árið 1933 og er yfirlýst stefna þess að það telji sér ekkert óviðkomandi er varðar hag og fræðslu læknanema. Félagið er hagsmunafélag læknanema og hefur frá upphafi verið ötult baráttufélag læknanema um kjaramál. Stjórn FL fer fyrir hagsmunastarfi læknanema og hefur lengi átt farsælt samstarf við deildar- og kennslustjóra læknadeildar. Félagsstarf læknanema hefur ætíð verið öflugt og á félagið undir- og samstarfsfélög sem halda meðal annars utan um alþjóðastarf læknanema, kennslumál, kynfræðslu, skyndihjálp, skemmtanahald og lýðheilsu.
  • Fulltrúaráð

  • Fulltrúaráð skipuleggur viðburði fyrir læknanema á öllum árum og skapa þar með frábæran vettvang til að kynnast tilvonandi kollegum. Meðal viðburða má nefna skíðaferð, vísindaferðir í hinar ýmsu stofnanir, fótboltamót læknanema, læknaleikar og hina sívinsælu árshátíð læknanema.
  • Kennslu- og fræðslumálanefnd

  • Kennslu- og fræðslumálanefnd (KF) starfar sem tengiliður nemenda við kennslu læknadeildar og sitja fulltrúar nefndarinnar á kennsluráðsfundum með stjórnendum kennslumála. KF heldur utan um og skipuleggur nemendakennslur og ýmsar kynningar um sérnám.
  • Lýðheilsufélag læknanema

  • Lýðheilsufélag læknanema er félag sem sér um hina ýmsu viðburði tengda lýðheilsu. Aðalmarkmið Lýðheilsufélagsins er að auka meðvitund um mikilvægi lýðheilsu meðal læknanema, sem og annarra hópa samfélagsins. Stærsti viðburður Lýðheilsufélagsins er hinn sívinsæli Bangsaspítali, sem snýr að því að minnka hræðslu barna við heilbrigðiskerfið en einnig að gefa 1. árs læknanemum dýrmæta reynslu.